✥ Τῇ Ζ’ (7ῃ) τοῦ αὐτοῦ μηνὸς ἑορτάζομεν τὴν ἀνάμνησιν τοῦ ἐν οὐρανῷ φανέντος σημείου τοῦ ΤΙΜΙΟΥ ΣΤΑΥΡΟΥ ἐπὶ Κωνσταντίου βασιλέως, υἱοῦ τοῦ Μεγάλου Κωνσταντίνου, καὶ Κυρίλλου Ἀρχιεπισκόπου Ἱεροσολύμων, ἐν ἔτει τμϛ’ (346).
Σταυροῦ παγέντος, ἡγιάσθη γῆ πάλαι,
Καὶ νῦν φανέντος, ἡγιάσθη καὶ πόλος.
Ἑβδομάτῃ Σταυροῖο τύπος πόλῳ ἀμφετανύθη.
✥ Τῇ αὐτῇ ἡμέρᾳ μνήμη τοῦ Ἁγίου Μάρτυρος ΑΚΑΚΙΟΥ.
Εἴπερ τις ἄλλος ἐν χορῷ τῶν Μαρτύρων,
Κάλλιστος Ἀκάκιος ἐκτμηθεὶς ξίφει.
✥ Τῇ αὐτῇ ἡμέρᾳ μνήμη τοῦ Ἁγίου Μάρτυρος ΚΟΔΡΑΤΟΥ καὶ τῶν σὺν αὐτῷ.
Ὑπὲρ Θεοῦ Κοδρᾶτος ἥκων πρὸς ξίφος,
Δοῦναι κοδράντην καὶ τὸν ἔσχατον θέλει.
✥ Τῇ αὐτῇ ἡμέρᾳ οἱ ἀνωτέρω ἀναφερόμενοι Ἅγιοι Μάρτυρες ΡΟΥΦΙΝΟΣ καὶ ΣΑΤΟΡΝΙΝΟΣ ξίφει τελειοῦνται.
Δυοῖν Συνάθλων πρὸς τομὸν τόλμη ξίφος,
Πίστει γὰρ ἐστομοῦντο τῇ τοῦ Κυρίου.
✥ Τῇ αὐτῇ ἡμέρᾳ μνήμη τοῦ Ὁσίου Πατρὸς ἡμῶν ΙΩΑΝΝΟΥ τοῦ Ψυχαΐτου.
Ψυχῆς μόνης σὺ τὴν σχέσιν φέρων,
Πάτερ, Ψυχαΐτης κέκλησαι ἐνδίκως, μάκαρ.
✥ Τῇ αὐτῇ ἡμέρᾳ μνήμη τοῦ Ἁγίου Μάρτυρος ΜΑΞΙΜΟΥ λίθοις βληθέντος καὶ τελειωθέντος.
Λίθοις ἐπιβὰς Μάξιμος μεγαλόνους,
Ἀνῆλθε χαίρων οὐρανοῦ εἰς τὸ πλάτος.
ΜΑΞΙΜΟΣ ὁ Ἅγιος Μάρτυς, παρρησίᾳ ὁμολογήσας τὸν Χριστὸν καὶ πολλοὺς εἰδωλολάτρας εἰς τὴν εὐσέβειαν ὁδηγήσας, πολλὰς τιμωρίας ὑπέμεινε πρότερον, τελευταῖον δὲ λιθοβοληθεὶς καὶ τρόπον τινὰ κύκλωθεν στεφανωθεὶς ὑπὸ τῶν λίθων, πρὸς Κύριον ἐξεδήμησεν, ἵνα λάβῃ παρ’ Αὐτοῦ τὸν τῆς ἀθλήσεως στέφανον.
✥ Τῇ αὐτῇ ἡμέρᾳ μνήμη τοῦ Ὁσίου καὶ Θεοφόρου Πατρὸς ἡμῶν ΝΕΙΛΟΥ τοῦ Νέου τοῦ καὶ Μυροβλύτου, τοῦ ἐν τῷ ὄρει τοῦ Ἄθωνος ἀσκήσαντος.
Νεῖλος ἄρδει νάμασι γῆν Αἰγυπτίων,
Ὁ δὲ Μοναστὰς τοῦ Ἄθωνος ἀρδεύει.
Λάμψεν ἐν ἥμαθ’ ἑβδομάτῳ νειλώϊος αἴγλη.
✥ Τῇ αὐτῆ ἡμέρᾳ μνήμη τοῦ Ἁγίου νέου Ὁσιομάρτυρος ΠΑΧΩΜΙΟΥ τοῦ ἐν τῷ Οὐσάκι τῆς Φιλαδελφείας μαρτυρήσαντος κατᾶ τὸ ἔτος ͵αψλ’ (1730) ξίφει τελειωθέντος τῇ Πέμπτῃ τῆς Ἀναλήψεως.
Ποῦ πάχος ἐν σοί, ὦ Παχώμι’ εὑρέθη,
Πόνοις ξίφει τε λεπτύναντι τὸ βρῖθος;