✥ Τῇ Ι’ (10ῃ) τοῦ αὐτοῦ μηνὸς μνήμη τῶν Ἁγίων Μαρτύρων ΜΗΝΑ τοῦ Καλλικελάδου, ΕΡΜΟΓΕΝΟΥΣ καὶ ΕΥΓΡΑΦΟΥ.
Εἰς τὸν Μηνᾶν.
Τμηθεὶς ὁ Μηνᾶς, κἂν κελαδεῖν οὐκ ἔχει,
Φιμοῖ κελαδοῦν δυσσεβείας τὸ στόμα.
Εἰς τὸν Ἑρμονένη·
Τὴν δυσσέβειαν ἐκπτύσας Ἑρμογένης,
Ὑπῆρξε Μάρτυς εὐσεβείας ἐκ ξίφους.
Εἰς τὸν Εὔγραφον·
Τὰς ἐκ μαχαίρας, Εὔγραφε, τρώσεις φέρων,
Ὀξὺς Θεοῦ κάλαμος ὤφθης εὖ γράφων.
Εὐκέλαδος δεκάτῃ Μηνᾶς ξίφει αὐχένα δῶκεν.
✥ Τῇ αὐτῇ ἡμέρᾳ μνήμη τοῦ Ἁγίου Μάρτυρος ΓΕΜΕΛΛΟΥ τοῦ Πολυάθλου.
Ὑπὲρ Θεοῦ Γέμελλος Ἐσταυρωμένου,
Τὴν ἐν ξύλῳ σταύρωσιν ἀσμένως φέρει.
✥ Τῇ αὐτῇ ἡμέρᾳ μνήμη τοῦ Ὁσίου Πατρὸς ἡμῶν ΘΩΜΑ τοῦ Δεφουρκινοῦ.
Θωμᾶς Θεὸν θεὶς ἀρραγεστάτην βάσιν,
Κρείττων πέφηνε μηχανῆς τῶν δαιμόνων.
✥ Ὁ Ἅγιος Ἱερομάρτυς ΘΕΟΤΕΚΝΟΣ ξίφει τελειοῦται.
Ὁ Θεότεκνος, οἷα τοῦ Θεοῦ τέκνον,
Θνῄσκει προθύμως τοῦ Πατρὸς χάριν ξίφει.
✥ Ὁ Ἅγιος Μάρτυς ΜΑΡΙΑΝΟΣ λιθοβοληθεὶς τελειοῦται.
Ὁ Μαριανὸς συντριβεὶς κάραν λίθῳ,
Θείῳ νοητῶς στέφεται ταύτην στέφει.
✥ Ὁ Ἅγιος Μάρτυς ΕΥΓΕΝΙΟΣ ξύλοις τυπτόμενος τελειοῦται.
Ὥσπερ συνεστὼς Εὐγένιος ἐκ ξύλου,
Πάσχων ξύλοις ὑπῆρχε πρὸς ξύλα ξύλον.