✥ Τῇ Ϛ’ (6ῃ) τοῦ αὐτοῦ μηνὸς μνήμη τοῦ Ἁγίου, Δικαίου, Πολυάθλου καὶ Προφήτου ΙΩΒ.
Εἰ καὶ θανὼν ἄληστος ἀνδρείας πέτρα,
Καὶ πῶς, Ἰώβ, κρύψω σε τῇ λήθης πέτρᾳ;
Ἕκτῃ Ἰὼβ πολύτλαν θανάτου νέφος ἀμφεκάλυψεν.
✥ Τῇ αὐτῇ ἡμέρᾳ οἱ Ὅσιοι ΜΑΜΑΣ, ΠΑΧΩΜΙΟΣ καὶ ΙΛΑΡΙΩΝ ἐν εἰρήνῃ τελειοῦνται.
Ἱλαρίωνι καὶ Παχωμίῳ Μάμας
Συνεξεδήμει τὴν καλὴν ἐκδημίαν.
✥ Ὁ Ἅγιος Μάρτυς ΔΗΜΗΤΡΙΩΝ τοξευόμενος τελειοῦται.
Βέλη τὰ τιτρώσκοντα σάρκα καιρίως,
Δημητρίων ἡγεῖτο βέλη νηπίων.
✥ Οἱ Ἅγιοι Μάρτυρες ΔΑΝΑΞ, ΜΕΣΙΡΟΣ καὶ ΘΕΡΙΝΟΣ ξίφει τελειοῦνται.
Ἀμφοῖν Ἀθλητῶν ἐκκεκομμένων κάρας
Κεῖται Μέσιρος ἐν μέσῳ κάρας δίχα.
✥ Ὁ Ἅγιος Μάρτυς ΔΟΝΑΤΟΣ τοξευόμενος τελειοῦται.
Ἄλλος ξένος τις ἥλιός μοι Δονᾶτος,
Σαρκὸς προΐσχων ἀκτίνων δίκην βέλη.
✥ Ὁ Ἅγιος Μάρτυς ΒΑΡΒΑΡΟΣ ξίφει τελειοῦται.
Τὴν κλῆσιν ἡμῖν βάρβαρος σύ, γεννάδα,
Ὁ δ’ αὖ τεμών σε βάρβαρος τὴν καρδίαν.
✥ Τελεῖται δὲ ἡ Σύναξις τῶν εἰρημένων Ἁγίων ἐν τῷ Μαρτυρίῳ αὐτῶν τῷ ἐν τῷ Δευτέρῳ.
✥ Τῇ αὐτῇ ἡμέρᾳ μνήμη τοῦ Ὁσίου καὶ Θεοφόρου Πατρὸς ἡμῶν ΣΕΡΑΦΕΙΜ, τοῦ ἐν τῷ ὄρει τοῦ Δομποῦ τῆς Λεβαδείας ἀσκήσαντος, ἐν εἰρήνῃ τελειωθέντος.
Λιπὼν Σεραφεὶμ τὸν κάτω καὶ τοῖς ἄνω
Φλογοφόροις σύνεστι Σεραφεὶμ χῶρον.