✥ Τῇ ΙΓ’ (13ῃ) τοῦ αὐτοῦ μηνὸς μνήμη τῆς Ἁγίας Μάρτυρος ΑΚΥΛΙΝΗΣ.
Τὸν παστὸν εὐτρέπιζε λαμπρόν, Νυμφίε,
Ἀκυλῖνα σοι τέμνεται νύμφη νέα.
Ἀμφὶ τρίτην δεκάτην κεφαλὴν τμήθη Ἀκυλῖνα.
✥ Μνήμη τῆς Ὁσίας μητρὸς ἡμῶν ΑΝΝΗΣ καὶ τοῦ υἱοῦ αὐτῆς ΙΩΑΝΝΟΥ.
Μήτηρ καὶ υἱός, Ἄννα καὶ Ἰωάννης,
ὤφθησαν ἄμφω οὐρανοῦ οἰκήτορες.
✥ Τῇ αὐτῇ ἡμέρᾳ μνήμη τοῦ Ὁσίου ΙΑΚΩΒΟΥ τοῦ ἐξ ἀπάτης τὸν ἀντίχριστον, ἤτοι τὸν διάβολον, προσκυνήσαντος.
Οἰήσεως οὐκ ἔστι τι χεῖρον πάθος,
Ταύτῃ γὰρ Ἰάκωβον ἐχθρὸς ἠπάτα.
✥ Ὁ Ἅγιος ΑΝΤΙΠΑΤΡΟΣ Ἐπίσκοπος Βόστρων ἐν εἰρήνῃ τελειοῦται.
Τὸν Ἀντίπατρον πλούσιον, Σῶτερ, δέχει,
Τῶν ἀρετῶν φέροντα κορβανᾶν μέγαν.
✥ Ὁ Ἅγιος ΕΥΛΟΓΙΟΣ Πατριάρχης Ἀντιοχείας ἐν εἰρήνῃ τελειοῦται.
Τὴν Βασιλείαν κλῆρον εὗρε τὴν ἄνω,
Σὺν Πατρὸς Εὐλόγιος εὐλογημένοις.
✥ Οἱ Ἅγιοι ΜΥΡΙΟΙ Μάρτυρες ξίφει τελειοῦνται.
Νικᾷ πεσοῦσα μυριὰς διὰ ξίφους,
Πίπτουσα καὶ γὰρ ἡ Θεοῦ νικᾷ φάλαγξ.
✥ Ὁ Ἅγιος Μάρτυς ΔΙΟΔΩΡΟΣ ὁ ἐξ Ἐμέσης σταυρωθεὶς τελειοῦται.
Ἀνῆλθε Διόδωρος εἰς Σταυροῦ ξύλον,
Τιμῶν Ἰησοῦν, οὗ πάθος Σταυροῦ ξύλον.