✥ Τῇ Θ’ (9ῃ) τοῦ αὐτοῦ μηνὸς ἡ Σύλληψις τῆς Ἁγίας ΑΝΝΗΣ μητρὸς τῆς Ὑπεραγίας Θεοτόκου.
Οὐχ ὥσπερ Εὔα καὶ σὺ τίκτεις ἐν λύπαις·
Χαρὰν γὰρ ἔνδον, Ἄννα, κοιλίας φέρεις,
Τῇ δ’ ἐνάτῃ Μαρίην Θεομήτορα σύλλαβεν Ἄννα.
Εἰς τὴν Σύλληψιν τῆς Ἁγίας Ἄννης ἔπλεξαν ἐγκώμια ἑλληνικὰ ὁ Γεώργιος Νικομηδείας, οὗ ἡ ἀρχή· «Οὐρανῶν ἡ γῆ ταῖς τῆς Χάριτος μαρμαρυγαῖς» (σῴζεται ἐν τῇ Μεγίστῃ Λαύρᾳ, ἐν τῇ τοῦ Διονυσίου καὶ ἐν τῷ πρώτῳ πανηγυρικῷ τῆς Μονῆς τοῦ Βατοπεδίου), ὁ Πέτρος Ἄργους, Λέων ὁ Σοφός, Ἰωάννης Μοναχὸς Εὐβοίας (ἀκμάσας περὶ τὸ 740) καὶ ἄλλοι. Εἰς τὴν ἁπλῆν Ἑλληνικὴν ἐγκώμιον ἐφιλοπόνησεν ὁ σύγχρονος τοῦ Ὁσίου Νικοδήμου καὶ ἐν Ἁγίῳ Ὄρει ἀσκήσας σοφὸς διδάσκαλος Χριστοφόρος ὁ Προδρομίτης. Τὸν Κανόνα τῆς ἑορτῆς συνέθεσεν ὁ Ἅγιος Ἀνδρέας ὁ Κρήτης.
✥ Τῇ αὐτῇ ἡμέρᾳ μνήμη τῆς Ἁγίας Προφήτιδος ΑΝΝΗΣ τῆς μητρὸς Σαμουὴλ τοῦ Προφήτου.
Τί σου ἐπαινέσειεν, Ἄννα, τίς πλέον;
Τὸ καρτερόφρον; ἢ τὸ τῆς εὐτεκνίας;
✥ Τῇ αὐτῇ ἡμέρᾳ μνήμη τοῦ Ὁσίου Πατρὸς ἡμῶν ΣΤΕΦΑΝΟΥ τοῦ νεολαμποῦς τοῦ ἐν τῷ Ἁγίῳ Ἀντίπᾳ κειμένου.
Ἐξήγαγες γῆς τὸν Στέφανον καὶ βίου,
Στέφει δὲ δόξης ἐστεφάνωσας, Λόγε.
✥ Ὁ Ἅγιος Μάρτυς ΣΩΣΙΘΕΟΣ ξίφει τελειοῦται.
Σωσίθεον σωθεῖσιν ἐγγράφει Λόγος,
Ὑπὲρ Θεοῦ σῴζοντος ἐκτετμημένον.
✥ Ὁ Ἅγιος Μάρτυς ΝΑΡΣΗΣ ὁ Πέρσης ξίφει τελειοῦται.
Πέρσης κάραν σοι Ναρσῆς, Χριστέ, προσφέρει,
Κρεῖττόν γε δῶρον σμυρνοχρυσολιβάνου.
✥ Ὁ Ἅγιος Μάρτυς ΙΣΑΑΚ ξίφει τελειοῦται.
Πάθους τὸ λεῖπον Ἰσαάκ, Σάρρας τέκνον,
Σφαγεὶς ἀνεπλήρωσεν Ἰσαὰκ νέος.