✥ Τῇ ΚΗ’ (28ῃ) τοῦ αὐτοῦ μηνὸς ἡ εὕρεσις τῶν τιμίων λειψάνων τῶν Ἁγίων Μαρτύρων Ἀναργύρων ΚΥΡΟΥ καὶ ΙΩΑΝΝΟΥ.
Ὀστᾶ φανέντα Μαρτύρων Ἀναργύρων,
Βλύζουσι κρουνοὺς θαυμάτων ἀναργύρως.
Εἰκάδι ὀγδοάτῃ Κῦρος φάνη ἠδ’ ὁμόαθλος.
✥ Τῇ αὐτῇ ἡμέρᾳ μνήμη τοῦ Ἁγίου Μάρτυρος ΠΑΠΠΙΟΥ.
Τὸν Παππίαν δὲ πῶς παρέλθω τῷ λόγῳ
Μάρτυρα ὄντα ἀνδρικὸν τοῦ Κυρίου;
✥ Τῇ αὐτῇ ἡμέρᾳ μνήμη τοῦ δικαίου καὶ μακαρίου ΣΕΡΓΙΟΥ τοῦ Μαγίστρου, τοῦ συστησαμένου τὴν Μονὴν τῆς Ὑπεραγίας Θεοτόκου, τὴν ἐν τῷ κόλπῳ Νικομηδείας, τὴν λεγομένην τοῦ Νικητιάτου.
Ὁ Σέργιος, μάγιστρος ὢν πρὶν ἐν βίῳ
Θεοῦ μάγιστρος νῦν δέδεικται ἐν Πόλῳ.
✥ Ὁ Ἅγιος Μάρτυς ΜΑΚΕΔΟΝΙΟΣ, τοὺς δακτύλους τῶν χειρῶν καὶ τῶν ποδῶν ἐκκοπείς, τελειοῦται.
Μακεδονίου Μάρτυρος τοὺς δακτύλους
Τέμνουσιν ἀνδρῶν δάκτυλοι μιαιφόνοι.
✥ Ὁ Ὅσιος ΟΥΛΚΙΑΝΟΣ ἐν εἰρήνῃ τελειοῦται.
Εἴσελθε χαίρων, Οὐλκιανὲ παμμάκαρ,
Τὴν οὐρανῶν ἤνοιξε Χριστός σοι πύλην.
✥ Ὁ Ἅγιος ΠΑΥΛΟΣ ὁ ἰατρὸς ἐν εἰρήνῃ τελειοῦται.
Ἔπαυε Παῦλος πρὶν τομῇ, καύσει χρίσει
Πάθη, τανῦν δὲ ταῦτα πρεσβείᾳ λύει.
✥ Οἱ Ἅγιοι ΔΥΟ ΠΑΙΔΕΣ σταυρωθέντες τελειοῦνται.
Ἐν τοῖς χρόνου πίναξι καὶ Παῖδας δύω
Σταυρουμένους γράφουσι παῖδες ζωγράφων.
✥ Ὁ Ὅσιος ΜΩΫΣΗΣ ὁ Ἀναχωρητὴς ἐν εἰρήνῃ τελειοῦται.
Τῶν ἀρετῶν ἀνῆλθε Μωϋσῆς εἰς ὄρος,
Κἀκεῖ τέθνῃκεν ὡς ὁ Μωσῆς εἰς ὄρος.
✥ Ὁ Ἅγιος ΔΟΝΑΓΟΣ Ἐπίσκοπος Λιβύης πυρὶ τελειοῦται.
Στέξον τὸ πῦρ, Δόναγε, τῆς γὰρ σῆς κάρας,
Ὥς φησι Χριστός, οὐκ ὀλεῖται θρὶξ ὅλως.
✥ Οἱ Ἅγιοι ΕΒΔΟΜΗΚΟΝΤΑ Μάρτυρες οἱ ἐν Σκυθοπόλει ξίφει τελειοῦνται.
Εἶχες μαθητὰς ἑπτάκις, Σῶτερ, δέκα
Ἔχεις ἀθλητὰς καὶ τοσούτους ἐκ ξίφους.
✥ Οἱ Ἅγιοι ΤΡΕΙΣ Μάρτυρες οἱ ἐκ Γαλατίας ξίφει τελειοῦνται.
Τρεῖς ἄνδρες ἡμεῖς, ἀλλὰ συμπνοίας λόγῳ
Ὡς εἷς ἰδοὺ χωροῦμεν οἱ τρεῖς πρὸς ξίφος.
✥ Ὁ Ὅσιος ΜΑΓΝΟΣ προσευχόμενος ἐν εἰρήνῃ τελειοῦται.
Ἐν τῇ προσευχῇ θεῖος ἐκπνεύσας Μάγνος,
Ὑπῆρξε δῆλος λῆξιν αἰτήσας βίου.
✥ Μνήμη τῶν Ὁσίων Πατέρων ἡμῶν ΣΕΡΓΙΟΥ καὶ ΓΕΡΜΑΝΟΥ ἐν Βαλάμῃ τῶν θαυματουργῶν Ρώσων.